Misrning rasmiy axborot agentligi tarqatgan xabarga ko’ra, Politsiya binosi yonida bomba hujumi uyushtirilgandan so’ng bir necha soat o’tib muvaqqat bosh vazir Hazem Beblaviy tarafidan “musulmon birodarlar”, jamoasi “terrorchi” tashkilot, deb e’lon qilindi.
Bosh Vazir o’rinbosari Xosam Isa hukumat yig’ilishidan so’ng o’tkazgan matbuot anjumanida “Misr Vazirlar Kengashi “Ixvonul Muslimin tashkilotini mamlakat ichkarisi va tashqarisida ham “terrorchi” tashkilot” deya e’lon qildi” deya xabar berdi. “Misr, shimoldan to janubga qadar, “Musulmon birodarlar” sodir etgan dahshatli jinoyatdan larzaga keldi”, deb aytdi u.
Hozirgi paytda bu qarorga qarshi mamlakat bo’ylab bir necha viloyat markazlarida ommaviy namoyishlar boshlanganiga qaramay, “Musulmon birodarlar” harakatiga bosim kuchaygani aytilmoqda. Uning kamida 16 a’zosi qo’lga olingan.
Prezident Husni muborak davrida ta’qiqlab qo’yilgan “Musulmon birodarlar” harakati Misr inqilobidan so’ng mamlakatda erkin nafas ola boshlagan edi. U Misr hukumatini qo’lga olishga harakat qilar ekan, Misr xalqida umid uyg’ondi. Chunki ayni jamoadan Misr prezidentligiga o’z nomzodini qo’ygan Muhammad Mursiy «Qur’on bizning dasturimizdir. Biz shariatdan boshqasiga rozi bo’lmaymiz», deb qaynoq ma’ruzalar qilgan edi. Safvat Hijoziy Muhammad ommaga qarata «Mursiyning sharofati bilan biz Xalifalik orzusi amalga oshishini guvohi bo’lyapmiz va xalq Allohning shariati tatbiq etilishini istaydi», dedi.
Shu tariqa “Musulmon birodarlar” harakati aksar xalqning qo’llovini qo’lga kiritib, parlamentda salmoqli o’rinni egalladi. Hatto “Musulmon birodarlar”, harakatining siyosiy «qo’li» bo’lgan Hurriyat va Adolat partiyasi raisi Muhammad Mursiy prezidentlik saylovida g’alaba qozondi.
Ammo Mursiy shariatni tilga olgan bilan, “Musulmon birodarlar”, harakati Xalifalikni emas, demokratiyani olg’a surgan harakat bo’lganligi sababli AQSh va G’arb davlatlari unga keng yo’l ochib berdi. “Musulmon birodarlar”, harakatining etakchilari fuqarolik davlati va demokratiyaga chaqirishni hokimiyatga kelishdan oldin boshlab yuborgan edi.
“Musulmon birodarlar” harakatiga mansub bo’lgan Muhammad Mursiy ochiqchasiga bunday dedi: «Jamoa Misrda Islomiy shariatni majburan kirgizishga harakat qilmaydi. Vatanparvarlik fikri shariatdan ustundir, u barcha misrliklarni jamlaydi».
Mursiydan barchaga ma’lum shar’iy hukm, ya’ni mast qiluvchi ichimlikning haromligi haqida so’rashganda, u «bu narsani parlament belgilaydi», deb javob berdi. Bu bayonotlarni Amerika o’sha zahoti mukofotladi. Amerikaning Qohiradagi elchisi Margaret Skobi ochiqchasiga: «AQSh Misr xalqi tanlagan demokratik hukumatni – modomiki u erkinliklarni qo’llab-quvvatlar, erkak va ayol huquqlarini bir xilda hurmat qilar ekan – qo’llab-quvvatlaydi», deb aytdi.
Aslini olganda, Mursiyning nima qilayotganini ko’rib turgan “Musulmon birodarlar” jamoasi ham, misrlik musulmonlar ham uni bundan qaytarishlari va Islomni tatbiq qilmagani uchun uni muhosaba qilishlari vojib edi. Alloh, Rosuli va mo’minlarni do’st tutish o’rniga, Amerika bilan do’st tutayotgani sababli Mursiydan yuz o’girishlari va musulmonlarning qudrat va ulug’liklarini qayta olib beradigan, bitta xalifa saylash uchun harakatga kelishlari shart edi. Lekin ular bunday qilishmadi.
Shunday bo’lsada ular bu borada biror yutuqni qo’lga kirita olishmadi. Shu yilning 3 iyulida Prezident Mursiy prezidentligidan qulatildi. Bunga norozi bo’lganlar ayovsiz qirg’in qilindi. Mana bugunga kelib uni “terrorchi” tashkilot deb e’lon qilindi.
AQSh davlat kotibi Jon Kerri Misrlik hamkasbi bilan telefon uchrashuvida 16 kishinining o’limi va 100dan kishining jarohatlanishiga sabab bo’lgan portlashni tanqid qilar ekan, “Musulmon birodarlar” harakatini “terrorchi” tashkilot deb e’lon qilinishidan tshvishda ekanligini bildirdi.
Shu erda bir savol tug’iladi: Husni Muborak qulagandan so’ng “Musulmon birodarlar” harakatini ochiqcha qo’llab kelgan AQSh hukumati nima uchun general As-Sisiy boshchiligidagi harbiy to’ntarishga izn berdi. Nima uchun u hozirda “terrorchi” tashkilot deb e’lon qilinib, a’zolari qo’lga olinayotgan bir patda faqat tashvish bildirish bilangina cheklanmoqda?
Bu savolning javobi o’zingizga havola. Fikr va mulohazalaringizni kutib qolamiz.
Qiyomuddin