Rossiya Suriyani S-300 bilan qurollantiradi
Rossiya Suriyaga zamonaviy S-300 zenit raketa kompleksini taqdim etadi. Bu haqda RF mudofaa vaziri Sergey Shoygu 24 sentyabr, dushanba kuni xabar berdi, deb yozmoqda TASS.
“Suriya qurolli kuchlariga ikki hafta ichida zamonaviy S-300 zenit raketa kompleksi taqdim etiladi. U 250 kilometrdan ortiq masofada havo hujumi vositalarini tutib olishi hamda bir vaqtning oʻzida havodagi bir nechta obʼektni aniq nishonga olishi mumkin”, – deya maʼlum qildi mudofaa vaziri.
Shoyguning soʻzlariga koʻra, S-300 oʻzining imkoniyatlari va tezligi bilan Suriya havo hujumidan mudofaa tizimining jangovar salohiyatini sezilarli darajada mustahkamlashi kerak.
Iyun oyida Suriya prezidenti Bashar Asad Rossiyadan S-300 zenit raketa komplekslari yetkazib berilishi haqida xabar bermasligini maʼlum qilgandi.
“Ushbu komplekslar taqdim etilishi yoki etilmasligi haqida biz hech kimga xabar bermaymiz. Bu qurol, u haqida qachon qoʻllanilsa, shunda bilib olishadi”, – degan edi Bashar Asad.
