Senatorlar: AQSh Suriya bo’yicha dadilroq choralar ko’rsin

414
0

Amerika ovozi tarqatgan xabarga ko’ra, Rossiya Suriya muxolifatining prezident Bashar Asaddan qutulish harakatini “o’jarlik” deya tanqid qilayapti. Bu talabdan voz kechilmas ekan, urush davom etadi, odamlar o’laveradi, deydi Tashqi ishlar vaziri Sergey Lavrov.

Kuni-kecha Rossiya Suriyadan 80 ga yaqin fuqarosini evakuatsiya qildi, asosan, ayollar va bolalarni. AQSh Davlat departamenti rasmiysi Viktoriya Nuland so’zlariga ko’ra, Rossiyaning bu qarori Suriyada xavfsizlik bilan bog’liq vaziyat tamoman izdan chiqqanligiga dalolat beradi.

Bir guruh amerikalik senatorlar Obama ma’muriyatidan Suriya oppozitsiyasiga hamda qochqinlarga yordamni oshirishni so’rayapti. Respublikachi senator Jon Makkeyn boshchiligidagi delegatsiya yaqinda Yaqin Sharq va Afg’onistonga safar qilgan edi.

“AQSh quvvatlovi, xususan, qurol-aslaha va o’q-dori bizga havodek zarur. Suriya uzra harbiy parvozlar taqiqlansin”, – degan iltijolarni eshitdik deydi Jon Makkeyn. Suriya muxolifati etakchilari Vashingtondan gumanitar ko’makni hozirgidek nohukumat tashkilotlar orqali emas, bevosita etkazishni so’ramoqda. Bu ularning salohiyati va xalqaro mavqeini yanada oshirgan bo’lardi.

Delegatsiya a’zolarining aytishicha, qo’shni davlatlarda jon saqlayotgan qochqinlar AQSh nega Suriyadagi qatliomga ko’z yumayapti, nega etarlicha harakat qilmayapti, deb shikoyat qilgan.

“Prezident Assad o’z fikrida turib olgan. Bu degani, qonli urush hali uzoq davom etadi. Mamlakat turli mazhablarga bo’linib, jihodchi va ekstremistlar uchun qulay makonga aylanadi”, – deydi senator Sheldon Vaytxaus.

Kongress a’zolari mazkur talab va tavsiyalar bitilgan maktubni prezident Barak Obamaga yo’llashgan.

Qo’shma Shtatlar prezident Bashar al-Assadning kuni bitgan desada, yana bir mojaroga bosh suqish, harbiy chora ko’rish fikridan yiroq. “Xunrezlikni tugatish, yangi muvaqqat hukumat tuzilishini tezlatish uchun xalqaro hamjamiyat birgalikda harakat qilishi lozim”, – deydi Davlat departamenti so’zlovchisi Viktoriya Nuland. Yilning ilk matbuot anjumanida BMT Bosh kotibi Pan Gi Mun diplomatiya Suriya mojarosini hal qilishga ojiz, deb ta’kidlagan.

Javob qoldiring:

Iltimos, sharhingizni kiriting!
Iltimos, ismingizni bu yerga kiriting

Time limit is exhausted. Please reload CAPTCHA.